ملک بھر میں آج مہنگائی اور بجلی کے زائد بلوں کے خلاف شٹرڈاؤن ہڑتال کی گئی ، جماعت اسلامی اور تاجر تنظیموں کی کال پر کئی شہروں میں احتجاج بھی کیا گیا
کراچی، لاہور اور پشاور سمیت ملک کے مختلف چھوٹے بڑے شہروں میں دکانیں اور کاروباری مراکز بند رہے، مختلف شہروں میں شاہراہوں پر ٹریفک کی روانی بھی معمول سے کم رہی
کراچی کے تاجروں کی جانب سے بجلی کے اضافی بلوں، مہنگائی کے خلاف شٹرڈاؤن ہڑتال رہی جس کی وجہ سے شہر کی تھوک اور بڑی مارکیٹیں بند رہیں تاہم محلوں کی سطح پر چھوٹی دکانیں کھلی رہیں۔
کراچی تاجر ایکشن کمیٹی نے پریس کانفرنس کرتے ہوئے نگران حکومت کو بجلی کے بھاری بلوں میں کمی اور اضافہ شدہ پیٹرولیم لیوی واپس لینے کے لئے 72گھنٹوں کا الٹی میٹم دیا ہے
کراچی بار ایسوسی ایشن نے بھی مہنگائی اور بجلی کے بلوں میں اضافےکے خلاف ہڑتال کی، کراچی بار کے جنرل سیکرٹری نے کہا کہ بجلی کے بلوں اورپیٹرولیم مصنوعات کی قیمتوں میں اضافہ بلاجواز ہے
دوسری جانب پنجاب بار کونسل نے مہنگائی کے خلاف ماتحت عدالتوں میں ہڑتال کی، وکلا عدالتوں میں پیش نہیں ہوئے
راولپنڈی میں بجلی بلوں میں اضافے پرخواجہ سراؤں کا بھی احتجاج،مظاہرین نے مریڑ چوک پر آئیسکو آفس کا گھیراؤ کیا، مظاہرین کا کہنا تھا کہ بجلی بلوں میں اضافہ کسی صورت قبول نہیں، بل کم کیے جائیں۔
