وفاقی تحقیقاتی ایجنسی نے سابق آرمی چیف جنرل(ر) قمر جاوید باجوہ کے سمدھی صابر حمید عرف مٹھو کے خلاف منی لانڈرنگ کے الزامات کی تحقیقات کا آغاز کردیا۔
ایف آئی اے کے مطابق صابر مٹھو کو اینٹی منی لانڈرنگ ایکٹ کے تحت 23 اکتوبر کو طلب کیا گیا ہے، ان کے خلاف کال اپ نوٹس ان کی تین رہائش گاہوں پربھجوادیا ہے۔
ایف آئی اے کے نوٹس کے مطابق صابر مٹھو کے 19بینک اکاؤنٹس ہیں جن میں سے 14اکاؤنٹس پاکستانی اور 5 غیر ملکی بینکوں میں ہیں، ان اکاؤنٹس کے ذریعے 5 ارب 34کروڑ روپے کی ٹرانزیکشن کی گئیں۔
ایف آئی اے کی جانب سے جاری ہونیوالے نوٹس میں صابر حمید کو بیرون ملک دوروں کی تفصیلات ، انکم ٹیکس گوشوارے اور 2016 سے 2023 تک کی کارروباری تفصیلات بھی فراہم کرنے کی ہدایت کی گئی ہے۔
ایف آئی اے نے صابر حمید سے اپنی اور اہلخانہ کی آف شور کمپنیوں کی تفصیلات بھی مانگ لیں ۔جنرل (ر) باجوہ کے سمدھی سے ان کی اور ان کے اہلخانہ کی زیر استعمال گاڑیوں کی تفصیلات بھی طلب کرلی گئی ہیں۔
