بدین میں میڈیا سےگفتگو کرتے ہوئے بلاول بھٹو نے کہا صرف گھر کی باتوں پر ہی سابق صدر آصف زرداری کے بیانات کا پابند ہوں، سیاسی اور آئینی معاملات میں پیپلز پارٹی کی سی ای سی کے فیصلوں کی پابندی لازمی ہے، حلقہ بندیوں کےبعد الیکشن کے زرداری کے بیان کا مطلب انہی سے پوچھا جائے۔
بلاول بھٹو زرداری کا کہنا تھا کہ کیئر ٹیکرز پر کوئی اعتراض نہیں لیکن یہ چیئر ٹیکرز نہ بنیں، ملک کے معاشی مسائل اتنے گمبھیر ہیں کہ نگران حکومت سے حل نہیں ہوسکتے، عوام کے چہروں پر لکھا ہوا ہے کہ وہ مشکل اور تکلیف میں ہیں، اگر نگران حکومت بجلی، پیٹرول اور ڈالر کی قیمت نیچے لاسکتی ہے تو اپنا جادو ضرور دکھائے۔
انھوں نے مزید کہا 90 دن تو بہت دور ہیں 60 دن میں الیکشن ہونے چاہیے تھے، 90 دن میں بھی نہیں کرانا چاہتے تو الیکشن کب کرائیں گے؟ کیا 100 دن میں الیکشن ہوں گے،120 دن میں الیکشن ہوں گے؟
ان کا کہنا تھا کہ عوام تکلیف میں ہیں، معیشت بدتر ہو رہی ہے، لوگ پریشان ہیں کہ بچوں کو اسکول کیسے بھیجیں، بزرگوں کا علاج کیسےکرائیں؟
