پنجاب میں جعلی انجکشن سے 12 افراد بصارت سے محروم ہوگئے

لاہور میں غیرمعیاری انجکشن سے شوگر کے 40 مریضوں کی بینائی متاثر ہوئی جن میں 12 بصارت سے محروم ہوگئے۔

ذرائع کے مطابق اصل انجکشن کی قیمت 40 ہزار سے ایک لاکھ روپے تک ہے لیکن گھر میں تیار کیے جانے والے جعلی انجکشن 1200 روپے میں فروخت کیے جارہے تھے، جعلی انجکشن بنانے میں ملوث دو افراد کی نشاندہی کرلی گئی ہے اور ان کی گرفتاری کے احکامات جاری کردیے گئے ہیں۔

نگران صوبائی وزیرصحت ڈاکٹر جاوید اکرم کا کہنا تھاکہ لاہور کے تقریباً 40 افراد غیر معیاری انجکشن سے متاثر ہوئے ہیں۔مارکیٹ سے غیرمعیاری انجکشنز کا سارا اسٹاک اٹھا لیا گیا ہے۔

دوسری جانب محکمہ صحت پنجاب نے ماہرامراض چشم ڈاکٹر اسد اسلم کی سربراہی میں کمیٹی قائم کر دی۔

لاہور اور قصور میں آنکھوں کے جعلی انجیکشنز سے بینائی متاثر ہونے کے بعد اب ملتان اور صادق آباد میں بھی ایسے ہی کیسز رپورٹ ہوئے ہیں۔