امریکی وزیر خارجہ انٹونی بلنکن نے کہا ہے کہ سعودی ولی عہد شہزادہ محمد بن سلمان کے ساتھ ملاقات بہت نتیجہ خیز رہی۔
حماس اور اسرائیل کے درمیان جاری جنگ کے دوران مشرق وسطیٰ کے خاص دورے پر موجود امریکی وزیر خارجہ انٹونی بلنکن سعودی دارالحکومت ریاض پہنچے۔
ریاض میں انٹونٹی بلنکن نے شہزادہ محمد بن سلمان سے ملاقات کی۔اسٹیٹ ڈیپارٹمنٹ کے مطابق بات چیت کے دوران حماس اور اسرائیل کے درمیان جاری جنگ کے حوالے سے تبادلہ خیال کیا گیا۔
ترجمان میتھیو ملر نے بتایا کہ ملاقات کے دوران بلنکن نے حماس کے حملوں کو روکنے، تمام یرغمالیوں کی رہائی کو یقینی بنانے اور تنازع کو پھیلنے سے روکنے پر امریکا کی غیر متزلزل توجہ کو اجاگر کیا۔
دوسری جانب اسرائیلی فورسز اور حماس کے درمیان لڑائی ہفتے کے روز بھی جاری رہی ۔۔ غزہ پر اسرائیلی بمباری سے مرنے والے فلسطینیوں کی تعداد 2329 ہوگئی ہے ۔ ہلاک شدگان میں 724 بچے اور 448 خواتین بھی شامل ہیں
ادھر حماس کے حملوں میں مزید 29 اسرائیلی ہلاک ہوئے۔ اسرائیل میں ہلاکتوں کی تعداد 1300 سے تجاوز کرگئی ہے، تھائی لینڈ کے مزید تین شہری بھی حماس کے حملوں میں مارے گئے۔
حماس کے خلاف زمینی کارروائی کے لئے اسرائیل نے شمالی غزہ کے شہریوں کو ایک بار پھر علاقے سے انخلاء اور جنوبی علاقے کی طرف منتقل ہونے کا الٹی میٹم دے رکھا ہے
اسرائیل نے لبنان کے ساتھ ساتھ شام کے شہر حلب پر بھی طیاروں سے بمباری کی ۔اسرائیلی فضائیہ نے ہفتے کو تعمیر نو کے بعد کھولا گیا رن وے ایک بار پھر تباہ کردیا ہے۔
