پالے کیلے: (این ڈبیو ایم نیوز) پاکستانی پیسرز کی محنت بارش میں بہ گئی ۔۔ مسلسل برستی بوندوں نے کھلاڑیوں کے ساتھ ساتھ شائقین کرکٹ کے ارمانوں پر بھی پانی پھیر دیا
ایشیا کرکٹ ون ڈے کرکٹ کپ میں پاکستان اور بھارت کے درمیان میچ بغیر نتیجہ ختم ہوگیا، بڑے مقابلے میں مسلسل بارش کی وجہ سے پاکستان کی اننگز شروع ہی نہ ہو سکی۔ آفیشلز نے مقررہ وقت ختم ہونے پر میچ کے اختتام کا اعلان کیا ۔ دونوں ٹیموں کو ایک ایک پوائنٹ دے دیا گیا، اس طرح پاکستان نے سپر 4 مرحلےکے لیے بھی کوالیفائی کرلیا۔
اس سے قبل سری لنکا کے پالی کیلے اسٹیڈیم میں کھیلے گئے میچ میں بھارتی کپتان روہت شرما نے ٹاس جیتا اور پہلے بیٹنگ کا فیصلہ کیا۔
بھارتی بیٹنگ لائن پاکستانی بولرز کے سامنے ابتدا سے ہی دباؤ کا شکار رہی، بھارتی کپتان روہت شرما ٹیم کے مجموعی 15 اسکور پر شاہین کاشکار بنے، روہت نے 22 گیندوں پر گیارہ رنز بنائے، اس کے بعد شاہین نے کوہلی کو 4 رنز پر بولڈ کیا۔
حارث رؤف نے شریس ائیر کو 14 رنز پر آؤٹ کیا، بھارت نے 3 وکٹوں کے نقصان پر 51 رنز بنائے تھے کہ ایک بار پھر بارش شروع ہو گئی جس کے باعث میچ روک دیا گیا۔
بارش رکنے کے بعد میچ دوبارہ شروع ہوا تو شبمن گل کو حارث رؤف نے بولڈ کردیا۔
اس موقع پر ہاردک پانڈیا اور ایشان کشن نے شاندار بلے بازی کا مظاہرہ کیا اور بغیر دباؤ کے کھیلتے ہوئے پاکستانی بولرز کو چاروں طرف شاٹس لگائے۔
204 کے مجموعی اسکور پر ایشان کشن 82 رنز بنا کر حارث رؤف کا شکار بنے جب کہ کچھ دیر بعد ہاردک پانڈیا بھی 87 رنز بنا کر شاہین کی گیند پر آؤٹ ہوگئے، ان کے بعد بھارت کی بقیہ وکٹیں پتوں کی طرح بکھرتی گئیں اور پوری ٹیم 266 رنز بنا کر 7 گیندوں قبل ہی آؤٹ ہوگئی۔
پاکستان کی جانب سے شاہین شاہ آفریدی نے 35 رنز دے کر 4 کھلاڑیوں کو پویلین روانہ کیا جب کہ نسیم شاہ نے 36 رنز دے کر 3 وکٹیں اور حارث رؤف نے 58 رنز دے کر 3 وکٹیں حاصل کیں۔
