توانائی کے شعبے میں فری مارکیٹ کااعلان، صارف کی مرضی ہوگی جس کمپنی سے بجلی خریدے، چیئرمین نیپرا

نیشنل الیکٹرک پاور ریگولیٹری اتھارٹی نے پاکستان مین بھی توانائی کے شعبے میں فری مارکیٹ لانے کااعلان کردیا

اسلام آباد میں میڈیا سے گفتگو کرتے ہوئےچیئرمین نیشنل الیکٹرک پاور ریگولیٹری اتھارٹی وسیم مختار نے کہا توانائی کے شعبے میں فری مارکیٹ لارہے ہیں، صارف کا جس کمپنی سے بجلی خریدنے کا ارادہ ہو وہ خریدے۔

اوور بلنگ پر انہوں نے کہا کہ حالات اس نہج پر پہنچ چکے ہیں کہ ہمیں کچھ تلخ فیصلےکرنے ہوں گے، اوور بلنگ کی روک تھام کے لیے کمیٹی بنا دی گئی ہے، بجلی کی قیمتیں کم کرنے کیلئے اسٹاف کیخلاف کارروائی اور پرائیوٹ سیکٹر کو لانا ضروری ہے۔

چیئرمین نیپرا نے بتایا کہ اس وقت بجلی کی پیداواری صلاحیت 48 ہزار میگاواٹ ہے، این ٹی ڈی سی کسی بھی پلانٹ کی پیداواری قیمت دیکھ کر بجلی حاصل کرتا ہے۔

وسیم مختار نے مزید کہا کہ بجلی کے ریٹ کا فیصلہ عوامی سماعت کے بعد کیا جاتا ہے، نیپرا نےکبھی بھی کوئی فیصلہ بند کمرے میں نہیں کیا۔